ಅದಾನಿ ಸಮೂಹದ ಆರು ಕಂಪೆನಿಗಳಲ್ಲಿ ವಿದೇಶಿ ಫಂಡ್ಗಳ ಹೂಡಿಕೆ ಬಗ್ಗೆ ಎದ್ದ ಪ್ರಶ್ನೆಗಳಿಗೆ ಸಂಬಂಧಪಟ್ಟಂತೆ ಮಾಧ್ಯಮಗಳಲ್ಲಿ ವರದಿಗಳು ಬಂದ ಮೇಲೆ ಭಾರತದ ಶತಕೋಟ್ಯಧಿಪತಿ- ಉದ್ಯಮಿ ಗೌತಮ್ ಅದಾನಿ ಆಸ್ತಿಯಲ್ಲಿ ಭಾರೀ ಇಳಿಕೆ ಮುಂದುವರಿದಿದೆ. ಈ ವಾರದಲ್ಲಿ (ಸೋಮವಾರದಿಂದ ಬುಧವಾರದ ತನಕ- 3 ದಿನದಲ್ಲಿ) 900 ಕೋಟಿ ಅಮೆರಿಕನ್ ಡಾಲರ್ನಷ್ಟು ಆಸ್ತಿಯನ್ನು ಕಳೆದುಕೊಂಡು, ನಿವ್ವಳ ಮೌಲ್ಯ 6760 ಕೋಟಿ ಯುಎಸ್ಡಿಗೆ ತಲುಪಿದ್ದಾರೆ 58 ವರ್ಷದ ಗೌತಮ್ ಅದಾನಿ. ಹಾಗಿದ್ದರೆ ನಷ್ಟ ಎಷ್ಟಾಗಿದೆ ಅಂತ ನೋಡುವುದಾದರೆ, 66,600 ಕೋಟಿ ರೂಪಾಯಿಗೂ ಹೆಚ್ಚು, ಪ್ರತಿ ಗಂಟೆಗೆ 925 ಕೋಟಿಗೂ ಹೆಚ್ಚು, ಇನ್ನು ನಿಮಿಷಕ್ಕೆ 15.41 ಕೋಟಿಗೂ ಹೆಚ್ಚು ಸಂಪತ್ತು ಕರಗಿದೆ. ಬುಧವಾರ ದಿನದ ಕೊನೆಗೆ ಬ್ಲೂಮ್ಬರ್ಗ್ ಅಂಕಿ-ಅಂಶದ ಮೂಲಕ ತಿಳಿದುಬಂದಿರುವ ಲೆಕ್ಕಾಚಾರ ಇದಾಗಿದೆ. ಗುರುವಾರ ಕೂಡ ಸಂಪತ್ತು ಇನ್ನಷ್ಟು ಕರಗಿದೆ. ಆ ಲೆಕ್ಕ ಇದರಲ್ಲಿ ಸೇರಿಲ್ಲ. ಕೆಲ ದಿನಗಳ ಹಿಂದೆಯಷ್ಟೇ ಏಷ್ಯಾದ ಎರಡನೇ ಶ್ರೀಮಂತರೆನಿಸಿಕೊಂಡ ಗೌತಮ್, ರಿಲಯನ್ಸ್ ಇಂಡಸ್ಟ್ರೀಸ್ ಅಧ್ಯಕ್ಷ ಮುಕೇಶ್ ಅಂಬಾನಿ ನಂತರದ ಸ್ಥಾನ ತಲುಪಿಕೊಂಡರು.
ಮಾಲೀಕರ ಬಗ್ಗೆ ಸರಿಯಾದ ಮಾಹಿತಿ ಇಲ್ಲ ಎಂಬ ಕಾರಣಕ್ಕೆ ಎನ್ಎಸ್ಇ ಡೆಪಾಸಿಟರಿಯಿಂದ ಮಾರಿಷಿಯಸ್ ಮೂಲದ ಮೂರು ಫಂಡ್ಗಳ ಡಿಮ್ಯಾಟ್ ಖಾತೆಯನ್ನು ಸ್ಥಗಿತಗೊಳಿಸಲಾಗಿದೆ. ಅವು ಅದಾನಿ ಸಮೂಹದ ಪ್ರಮುಖ ಕಂಪೆನಿಗಳಲ್ಲಿ ಹೂಡಿಕೆ ಮಾಡಿರುವ ಫಂಡ್ಗಳಾಗಿವೆ ಎಂದು ಎಕನಾಮಿಕ್ ಟೈಮ್ಸ್ನಲ್ಲಿ ವರದಿ ಬಂದ ಮೇಲೆ, ಸೋಮವಾರದಿಂದ (ಜೂನ್ 14, 2021) ಕಂಪೆನಿಯ ಷೇರುಗಳಲ್ಲಿನ ಬೆಲೆ ಕುಸಿತ ಶುರುವಾಯಿತು. ಅಲ್ಬುಲಾ ಇನ್ವೆಸ್ಟ್ಮೆಂಟ್ ಫಂಡ್, ಕ್ರೆಸ್ಟಾ ಫಂಡ್ ಮತ್ತು ಎಪಿಎಂಎಸ್ ಇನ್ವೆಸ್ಟ್ಮೆಂಟ್ ಫಂಡ್- ಈ ಮೂರೂ ಸೇರಿ ಅದಾನಿಗೆ ಸೇರಿದ ಕಂಪೆನಿಗಳಲ್ಲಿ 600 ಕೋಟಿ ಅಮೆರಿಕನ್ ಡಾಲರ್ ಮೌಲ್ಯದ ಷೇರುಗಳನ್ನು ಹೊಂದಿವೆ. ಆದರೆ ಮಾಧ್ಯಮಗಳಲ್ಲಿ ಬಂದ ವರದಿ ತಪ್ಪಿನಿಂದ ಕೂಡಿರುವಂಥದ್ದು ಎಂದು ಅದಾನಿ ಸಮೂಹದಿಂದ ಹೇಳಲಾಯಿತು. ಉದ್ದೇಶಪೂರ್ವಕವಾಗಿ ಹೂಡಿಕೆದಾರರನ್ನು ದಿಕ್ಕು ತಪ್ಪಿಸಲಾಗುತ್ತಿದೆ ಎಂದು ಆರೋಪಿಸಿತು. ಆದರೆ ಹೂಡಿಕೆದಾರರು ಪಾರದರ್ಶಕತೆ ಬಗ್ಗೆ ಆತಂಕಕ್ಕೆ ಒಳಗಾಗಿ, ಕಂಪೆನಿಯ ಷೇರುಗಳನ್ನು ಮಾರಿ, ಹೊರಬರುತ್ತಿದ್ದಾರೆ.
ಮಾರಿಷಿಯಸ್ ಮೂಲದ 3 ಫಂಡ್ಗಳು ತಮ್ಮ ಆಸ್ತಿಯಲ್ಲಿ ಶೇ 90ಕ್ಕೂ ಹೆಚ್ಚು ಮೊತ್ತವನ್ನು ಅದಾನಿ ಸಮೂಹದ ಕಂಪೆನಿಗಳಲ್ಲಿ ಹೂಡಿಕೆ ಮಾಡಿವೆ ಎಂದು ಬ್ಲೂಮ್ಬರ್ಗ್ ಇಂಟೆಲಿಜೆನ್ಸ್ ಹೇಳಿದೆ. ಅಂತಿಮವಾಗಿ ಷೇರುಗಳ ಮಾಲೀಕರು ಯಾರು ಎಂಬ ಬಗ್ಗೆ ಸ್ಪಷ್ಟತೆ ದೊರೆಯಬೇಕಿದೆ ಎಂದು ಸ್ವತಂತ್ರ ವಿಶ್ಲೇಷಕರೊಬ್ಬರು ಹೇಳಿದ್ದಾರೆ. ಎಕ್ಸ್ಚೇಂಜ್ ಫೈಲಿಂಗ್ಸ್ನಲ್ಲಿ ಈ ವಾರ ತಿಳಿಸಿರುವುದನ್ನು ಹೊರತುಪಡಿಸಿ, ಬೇರೆ ಯಾವುದೇ ಮಾಹಿತಿ ನೀಡಲು ಅದಾನಿ ಸಮೂಹ ವಕ್ತಾರರು ನಿರಾಕರಿಸಿದ್ದಾರೆ. ವಿದೇಶೀ ಹೂಡಿಕೆದಾರರು ಅದಾನಿ ಎಂಟರ್ಪ್ರೈಸಸ್ನಲ್ಲಿ ದಶಕಗಳಿಗೂ ಹೆಚ್ಚು ಕಾಲದಿಂದ ಹೂಡಿಕೆ ಮಾಡುತ್ತಿದ್ದಾರೆ ಎಂದು ಜೂನ್ 14ರ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಹೌದು ಭಾರತೀಯ ಷೇರುಪೇಟೆಯಲ್ಲಿ ವಾರದ ಆರಂಭದ ದಿನವೇ ಅದಾನಿ ಗ್ರೂಪ್ ಆಫ್ ಕಂಪನೀಸ್ ಗೆ ಬ್ಲಡ್ ಬಾತ್ (ರಕ್ತದೋಕುಳಿ) ಅನುಭವ ಆಗಿದೆ. ಅದಾನಿ ಗ್ರೂಪ್ ಆಫ್ ಕಂಪನೀಸ್ ಷೇರುಗಳ ಬೆಲೆ ಶೇ. 5 ರಿಂದ ಶೇ. 20 ರವರೆಗೆ ಕುಸಿದಿವೆ. ಇಂದು ಷೇರುಪೇಟೆ ಶುರುವಾದ ಮೂರೇ ಗಂಟೆಯಲ್ಲಿ ಅದಾನಿ ಗ್ರೂಪ್ ಕಂಪನಿಗಳ ಷೇರುಗಳ ಬೆಲೆಯಲ್ಲಿ ಭಾರಿ ಕುಸಿತ ಕಂಡಿವೆ. ಷೇರುಪೇಟೆಯಲ್ಲಿ ಅದಾನಿ ಕಂಪನಿಗಳ ಒಟ್ಟಾರೆ ಷೇರು ಮಾರುಕಟ್ಟೆ ಬಂಡವಾಳ 8.58 ಲಕ್ಷ ಕೋಟಿ ರೂಪಾಯಿ. ಆದರೆ ಇವತ್ತು ಒಂದೇ ದಿನ ಕೇವಲ ಮೂರು ನಾಲ್ಕು ಗಂಟೆಗಳಲ್ಲೇ ಅದಾನಿ ಕಂಪನಿಗಳ ಷೇರು ಬೆಲೆಯಲ್ಲಿ 91,704 ಕೋಟಿ ರೂಪಾಯಿ ಕುಸಿತ ಆಗಿದೆ. ಅದಾನಿ ಗ್ರೂಪ್ ಕಂಪನಿಗಳಲ್ಲಿ ಯಾವ್ಯಾವ ಕಂಪನಿಯ ಷೇರು ಬೆಲೆ ಎಷ್ಟು ಕುಸಿದಿದೆ ಎನ್ನುವುದರ ವಿವರ ಹೀಗಿದೆ.
ಅದಾನಿ ಗ್ರೂಪ್ ಷೇರು ಬೆಲೆ ಕುಸಿತ
ಅದಾನಿ ಪೋರ್ಟ್ಸ್ – 27,635 ಕೋಟಿ ರೂಪಾಯಿ ಕುಸಿತ, ಅದಾನಿ ಪವರ್ – 2,854 ಕೋಟಿ ರೂಪಾಯಿ ಕುಸಿತ, ಅದಾನಿ ಟ್ರಾನ್ಸ್ ಮಿಷನ್ – 8,809 ಕೋಟಿ ರೂಪಾಯಿ ಕುಸಿತ, ಅದಾನಿ ಎಂಟರ್ ಪ್ರೈಸಸ್ – 35,238 ಕೋಟಿ ರೂಪಾಯಿ ಕುಸಿತ, ಅದಾನಿ ಗ್ರೀನ್ ಎನರ್ಜಿ – 8,188 ಕೋಟಿ ರೂಪಾಯಿ ಕುಸಿತ, ಅದಾನಿ ಟೋಟಲ್ ಗ್ಯಾಸ್ – 8,980 ಕೋಟಿ ರೂಪಾಯಿ ಕುಸಿತ…. ಒಟ್ಟಾರೆ – 91,704 ಕೋಟಿ ರೂಪಾಯಿ ಕುಸಿತ
ಅದಾನಿ ಪೋರ್ಟ್ ಕಂಪನಿಯ ಷೇರು ಬೆಲೆ ಇವತ್ತು ತಲಾ 104 ರೂಪಾಯಿ ಕುಸಿತ ಕಂಡಿದೆ. ಅದಾನಿ ಪೋರ್ಟ್ ಕಂಪನಿಯ ಷೇರು ಬೆಲೆ ಇವತ್ತು ಬೆಳಿಗ್ಗೆ 9.15 ಕ್ಕೆ ಷೇರುಪೇಟೆ ವಹಿವಾಟು ಶುರುವಾದಾಗ, 840 ರೂಪಾಯಿ ಇತ್ತು. ಮಧ್ಯಾಹ್ನ 12.24ರ ಹೊತ್ತಿಗೆ 104 ರೂಪಾಯಿ ಕುಸಿತ ಕಂಡು 736ರೂಪಾಯಿಗೆ ಬಂದು ತಲುಪಿತ್ತು. ಶೇ.12.49 ರಷ್ಟು ಕುಸಿತ ಕಂಡಿತ್ತು.
ಇನ್ನು ಅದಾನಿ ಎಂಟರ್ ಪ್ರೈಸಸ್ ಕಂಪನಿಯ ಷೇರುಗಳ ಬೆಲೆ ಬೆಳಿಗ್ಗೆ 1602 ರೂಪಾಯಿ ಇದಿದ್ದು, ಮಧ್ಯಾಹ್ನದ ವೇಳೆಗೆ 178 ರೂಪಾಯಿ ಕುಸಿತ ಕಂಡು, 1423ಕ್ಕೆ ಬಂದು ನಿಂತಿತ್ತು. ಅದಾನಿ ಎಂಟರ್ ಪ್ರೈಸಸ್ ಷೇರುಗಳ ಬೆಲೆ ಮಧ್ಯಾಹ್ನ 12.24ರ ಹೊತ್ತಿಗೆ ಶೇ.11.15 ರಷ್ಟು ಕುಸಿತ ಕಂಡಿದ್ದವು. ಹೀಗೆ ಅದಾನಿ ಟ್ರಾನ್ಸ್ ಮಿಷನ್, ಅದಾನಿ ಗ್ರೀನ್ ಎನರ್ಜಿ, ಅದಾನಿ ಟೋಟಲ್ ಗ್ಯಾಸ್ ಕಂಪನಿಗಳ ಷೇರು ಬೆಲೆ ತಲಾ ಶೇ.5 ರಷ್ಟು ಕುಸಿತ ಕಂಡಿವೆ.
ಅದಾನಿ ಗ್ರೂಪ್ ನಮ್ಮ ದೇಶದಲ್ಲಿ ಅಲ್ಪ ಕಾಲಾವಧಿಯಲ್ಲಿ ಭಾರೀ ಬೆಳವಣಿಗೆ ಕಂಡ ಕಂಪನಿ. ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಅದಾನಿ ಗ್ರೂಪ್ ಪ್ರವರ್ತಕ ಗೌತಮ್ ಅದಾನಿ ಆಪ್ತರು. ಗೌತಮ್ ಅದಾನಿ ಗುಜರಾತ್ ರಾಜ್ಯದವರು. ರಿಲಯನ್ಸ್ ನಂತೆ ವೇಗವಾಗಿ ಬೆಳೆಯುತ್ತಿರುವ ಕಂಪನಿಗಳಲ್ಲಿ ಅದಾನಿ ಗ್ರೂಪ್ ಆಫ್ ಕಂಪನಿ ಕೂಡ ಒಂದು. ಆದರೆ, ಇಂಥ ಕಂಪನಿಯ ಷೇರುಗಳ ಬೆಲೆ ದಿಢೀರನೇ ಇಂದು ಕುಸಿಯಲು ಕಾರಣ ಕೂಡ ಇದೆ. ಹೂಡಿಕೆದಾರರು ಅದಾನಿ ಗ್ರೂಪ್ ಕಂಪನಿಗಳ ಷೇರುಗಳನ್ನು ಭಾರಿ ಪ್ರಮಾಣದಲ್ಲಿ ಮಾರುತ್ತಿರುವುದಿರಂದ ಷೇರುಗಳಿಗೆ ಬೇಡಿಕೆ ಕುಸಿದು ಬೆಲೆ ಕುಸಿಯುತ್ತಿದೆ.
ಅದಾನಿ ಗ್ರೂಪ್ ಕಂಪನಿಗಳ ಬೆಲೆ ಇಂದು ಷೇರುಮಾರ್ಕೆಟ್ ನಲ್ಲಿ ಕುಸಿಯಲು ನ್ಯಾಷನಲ್ ಸೆಕ್ಯೂರೀಟೀಸ್ ಡಿಪಾಸಿಟರಿ ಲಿಮಿಟೆಡ್ (NSDL) ನ ಒಂದು ಆದೇಶ ಕಾರಣ. ಎನ್‌ಎಸ್‌ಡಿಎಲ್‌, ಅದಾನಿ ಗ್ರೂಪ್ ಗೆ ಸೇರಿದ ಮೂರು ವಿದೇಶಿ ಫಂಡ್ ಗಳ ಖಾತೆಯನ್ನು ಸ್ಥಗಿತ ಮಾಡಿದೆ. ಅಲಬುಲ್ ಇನ್ ವೆಸ್ಟ್ ಮೆಂಟ್ ಫಂಡ್, ಕ್ರೆಸ್ಟಾ ಫಂಡ್, ಎಪಿಎಂಎಸ್ ಫಂಡ್‌ನ ಡಿಮ್ಯಾಟ್ ಖಾತೆಗಳ ನಿರ್ಬಂಧ ಮಾಡಿದೆ.
ಈ ಮೂರು ಕಂಪನಿಗಳು 43,500 ಕೋಟಿ ರೂಪಾಯಿಯಷ್ಟು ಮೌಲ್ಯದ ಹೂಡಿಕೆಯನ್ನು ಅದಾನಿ ಸಮೂಹದ ಕಂಪೆನಿಗಳಲ್ಲಿ ಹೊಂದಿವೆ. ಮೇ 31 ಅಥವಾ ಅದಕ್ಕೂ ಮೊದಲೇ ಅದಾನಿ ಕಂಪನಿಯಲ್ಲಿ ಹೂಡಿಕೆ ಮಾಡಿರುವ ಮೂರು ವಿದೇಶಿ ಫಂಡ್ ಗಳ ಡಿಮ್ಯಾಟ್ ಖಾತೆ ಸ್ಥಗಿತಕ್ಕೆ ಆದೇಶ ನೀಡಿದೆ. ಆದರೆ ಜೂನ್ 13ರವರೆಗೂ ಈ ಸುದ್ದಿ ಮಾಧ್ಯಮಗಳಲ್ಲಿ ಬಹಿರಂಗವಾಗಿಯೇ ಇಲ್ಲ. ಜೂನ್ 13ರ ಭಾನುವಾರ ಸುದ್ದಿ ಬಹಿರಂಗವಾಗಿದೆ. ಹೀಗಾಗಿ ಜೂನ್ 14ರ ಸೋಮವಾರ ಅದಾನಿ ಗ್ರೂಪ್ ಕಂಪನಿಗಳ ಷೇರು ಹೂಡಿಕೆದಾರರು ಅದಾನಿ ಗ್ರೂಪ್ ಕಂಪನಿಗಳ ಷೇರುಗಳನ್ನು ಭಾರಿ ಪ್ರಮಾಣದಲ್ಲಿ ಮಾರಿದ್ದರಿಂದ ಷೇರುಗಳ ಬೆಲೆ ಕುಸಿತ ಕಂಡಿದೆ.
ಅದಾನಿ ಕಂಪನಿಯಲ್ಲಿ ವಿದೇಶಿ ಫಂಡ್ಗಳು ಹೊಂದಿರುವ ಮಾಲೀಕತ್ವಕ್ಕೆ ಸಂಬಂಧಿಸಿದ ವಿವರಗಳನ್ನು ಸೆಬಿ ಹಾಗೂ ನ್ಯಾಷನಲ್ ಸೆಕ್ಯೂರೀಟೀಸ್ ಡಿಪಾಸಿಟರಿ ಲಿಮಿಟೆಡ್ ಗೆ ಸಲ್ಲಿಸಿರಲಿಲ್ಲ. ಮೂರು ಕಂಪನಿಗಳು ಮಾರಿಷನ್ ಕಂಪನಿಗಳು. ಈ ಕಂಪನಿಗಳು ಕೆವೈಸಿ ನಿಯಮ ಪಾಲಿಸಿರಲಿಲ್ಲ. ಪ್ರಿವೆನ್ಷನ್ ಆಫ್ ಮನಿ ಲ್ಯಾಂಡರಿಂಗ್ ಆ್ಯಕ್ಟ್ ನಡಿ ಕೆವೈಸಿ ನಿಯಮ ಪಾಲಿಸಿ, ಷೇರುಗಳ ಮಾಲೀಕತ್ವಕ್ಕೆ ಸಂಬಂಧಿಸಿದ ವಿವರಗಳನ್ನು ಸೆಬಿ ಹಾಗೂ ನ್ಯಾಷನಲ್ ಸೆಕ್ಯೂರೀಟೀಸ್ ಡಿಪಾಸಿಟರಿ ಲಿಮಿಟೆಡ್ ಗೆ ಸಲ್ಲಿಸುವುದನ್ನು ಕಳೆದ ವರ್ಷದಿಂದ ಸೆಬಿ ಕಡ್ಡಾಯ ಮಾಡಿದೆ.
ಸಮರ್ಪಕವಾಗಿ ವಿವರ ಸಲ್ಲಿಸದ ಕಾರಣದಿಂದ ಅದಾನಿ ಗ್ರೂಪ್‌ನ ಮಾರಿಷಸ್ ಫಂಡ್ಗಳ ಡಿಮ್ಯಾಟ್ ಖಾತೆಯನ್ನು ಸ್ಥಗಿತಗೊಳಿಸಲಾಗಿದೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆಯು ವರದಿ ಮಾಡಿದೆ. ಸದ್ಯಕ್ಕೆ ಈ ಡಿಮ್ಯಾಟ್ ಖಾತೆಯಲ್ಲಿ ಇರುವ ಷೇರುಗಳನ್ನು ಫಂಡ್ಗಳವರು ಮಾರಲು ಆಗಲ್ಲ. ಆಲಬುಲ್ ಇನ್ ವೆಸ್ಟ್ ಮೆಂಟ್ ಫಂಡ್, ಕ್ರೆಸ್ಟಾ ಫಂಡ್, ಎಪಿಎಂಎಸ್ ಫಂಡ್ ಗಳು ವಿದೇಶಿ ಬಂಡವಾಳ ಹೂಡಿಕೆದಾರರೆಂದು ಸೆಬಿಯಲ್ಲಿ ನೋಂದಾಯಿತವಾಗಿವೆ. ಈ ಮೂರು ಫಂಡ್ ಗಳು ಅದಾನಿ ಗ್ರೂಪ್ ಆಫ್ ಕಂಪನಿಗಳಲ್ಲಿ ಷೇರು ಪಾಲನ್ನು ಹೊಂದಿವೆ. ಈ ಮೂರು ವಿದೇಶಿ ಫಂಡ್ ಗಳು, ಅದಾನಿ ಎಂಟರ್ ಪ್ರೈಸಸ್ ನಲ್ಲಿ ಶೇ.6.82 ರಷ್ಟು ಷೇರು ಹೊಂದಿವೆ. ಅದಾನಿ ಟ್ರಾನ್ಸ್ ಮಿಷನ್ ನಲ್ಲಿ ಶೇ.8 ರಷ್ಟು ಷೇರು ಹೊಂದಿವೆ. ಅದಾನಿ ಟೋಟಲ್ ಗ್ಯಾಸ್ ನಲ್ಲಿ ಶೇ.5.92 ರಷ್ಟು ಷೇರು , ಅದಾನಿ ಗ್ರೀನ್ ನಲ್ಲಿ ಶೇ.3.58 ರಷ್ಟು ಷೇರು ಹೊಂದಿವೆ.
ಸೆಬಿ, 2019ರಲ್ಲಿ ವಿದೇಶಿ ಬಂಡವಾಳ ಹೂಡಿಕೆದಾರರಿಗೆ ಕೆವೈಸಿ ಘೋಷಣೆ ಕಡ್ಡಾಯ ಮಾಡಿದೆ. ಹೊಸ ನಿಯಮ ಪಾಲಿಸಲು 2020ರವರೆಗೆ ಕಾಲಾವಕಾಶ ನೀಡಲಾಗಿತ್ತು. ಹೊಸ ನಿಯಮದಡಿ, ಫಂಡ್ ಮ್ಯಾನೇಜರ್ ಸೇರಿದಂತೆ ಇನ್ನೂ ಕೆಲ ಹೆಚ್ಟುವರಿ ಮಾಹಿತಿ ನೀಡಬೇಕಾಗಿತ್ತು. ಆದರೆ ಈ ಮಾಹಿತಿಗಳನ್ನು ನೀಡಿಲ್ಲ.
ಅದಾನಿ ಗ್ರೂಪ್ ಕಂಪನಿ ಷೇರು ಬೆಲೆ ಬಗ್ಗೆಯೂ ತನಿಖೆ:
ಅದಾನಿ ಗ್ರೂಪ್ ಕಂಪನಿಗಳ ಷೇರು ಬೆಲೆ ಕೂಡ ಕಳೆದ ಒಂದು ವರ್ಷದಲ್ಲಿ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಅದಾನಿ ಗ್ರೂಪ್ ಕಂಪನಿಗಳ ಷೇರು ಬೆಲೆ ಶೇ. 200 ರಿಂದ ಶೇ. 1000 ದವರೆಗೂ ಏರಿಕೆಯಾಗಿದೆ. ಹೀಗೆ ಒಂದೇ ವರ್ಷದಲ್ಲಿ ಷೇರು ಬೆಲೆ ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಲು ಏನು ಕಾರಣ? ಷೇರು ಬೆಲೆಯಲ್ಲಿ ಏನಾದರೂ ಮೋಸ ನಡೆದಿದೆಯೇ ಎಂಬ ಬಗ್ಗೆ ಸೆಬಿ ತನಿಖೆ ನಡೆಸುತ್ತಿದೆ.
ಕಳೆದೊಂದು ವರ್ಷದಲ್ಲಿ ಅದಾನಿ ಟ್ರಾನ್ಸ್ ಮಿಷನ್ ಷೇರು ಬೆಲೆ ಶೇ. 669 ರಷ್ಟು ಏರಿಕೆ ಕಂಡಿವೆ. ಅದಾನಿ ಟೋಟಲ್ ಗ್ಯಾಸ್ ಷೇರು ಬೆಲೆ ಶೇ. 339 ರಷ್ಟು ಏರಿಕೆ ಕಂಡಿವೆ. ಅದಾನಿ ಎಂಟರ್ ಪ್ರೈಸಸ್ ಷೇರು ಬೆಲೆ ಶೇ. 972 ರಷ್ಟು ಏರಿಕೆ ಕಂಡಿವೆ. ಅದಾನಿ ಗ್ರೀನ್ ಷೇರು ಬೆಲೆ ಶೇ.254 ರಷ್ಟು ಏರಿಕೆ ಕಂಡಿವೆ. ಅದಾನಿ ಪೋರ್ಟ್ಸ್ ಶೇ. 147, ಅದಾನಿ ಪವರ್ ಶೇ. 295 ರಷ್ಟು ಏರಿಕೆ ಕಂಡಿವೆ. ಇದರಿಂದಾಗಿ ಜೂನ್ 11ರ ಕಳೆದ ಶುಕ್ರವಾರ ಅದಾನಿ ಗ್ರೂಪ್ ಕಂಪನಿಗಳ ಷೇರು ಬಂಡವಾಳ ಮೌಲ್ಯ 9.5 ಲಕ್ಷ ಕೋಟಿ ರೂಪಾಯಿ ಆಗಿತ್ತು . ಗೌತಮ್ ಅದಾನಿ ಏಷ್ಯಾದಲ್ಲೇ ಎರಡನೇ ಅತಿ ದೊಡ್ಡ ಶ್ರೀಮಂತ ವ್ಯಕ್ತಿ.
ಅದಾನಿ ಟ್ರಾನ್ಸ್ ಮಿಷನ್ ಕಂಪನಿಯಲ್ಲಿ ಪ್ರವರ್ತಕ ಕಂಪನಿಯಾದ ಅದಾನಿ ಗ್ರೂಪ್ ಶೇ. 74.9 ರಷ್ಟು ಷೇರು ಹೊಂದಿದೆ. ಅದಾನಿ ಎಂಟರ್ ಪ್ರೈಸಸ್, ಅದಾನಿ ಟೋಟಲ್ ಗ್ಯಾಸ್ ನಲ್ಲೂ ಪ್ರವರ್ತಕ (ಪ್ರಮೋಟರ್) ಗ್ರೂಪ್ ಶೇ. 74 ರಷ್ಟು ಷೇರು ಹೊಂದಿದೆ. ಅದಾನಿ ಗ್ರೀನ್ ನಲ್ಲಿ ಪ್ರವರ್ತಕ ಗ್ರೂಪ್ ಶೇ. 56ರಷ್ಟು ಷೇರು ಹೊಂದಿದೆ.
