ನೀವು 80, 90 ರ ದಶಕದಲ್ಲಿ ಜನಿಸಿದ್ದರೆ, ನಿರ್ಮಾ ಕಂಪೆನಿಯ ಜಾಹೀರಾತಿನ ಬಗ್ಗೆ ನಿಮಗೆ ಖಚಿತವಾಗಿ ಗೊತ್ತಿರುತ್ತದೆ. ಕಂಪನಿಯನ್ನು ಕೆಳಹಂತದಿಂದ ಈ ಮಟ್ಟಕ್ಕೆ ತಲುಪುವಂತೆ ಮಾಡಿದ್ದೇ ನಿರ್ಮಾದ ಆ ಜಾಹೀರಾತು. ಆ ದಿನಗಳಲ್ಲಿ ಕೆಲವೇ ಟಿವಿ ಚಾನೆಲ್‌ಗಳಿದ್ದು ಅವುಗಳಲ್ಲಿ ಕೆಲವೇ ಕಾರ್ಯಕ್ರಮಗಳು ಬರುತ್ತಿದ್ದವು ಮತ್ತು ಆ ಸಮಯದಲ್ಲಿ ನಿರ್ಮಾ ‘ವಾಶಿಂಗ್ ಪೌಡರ್ ನಿರ್ಮಾ’ ಎಂಬ ಜಿಂಗಲ್ ಬಿರುಗಾಳಿಯಂತೆ ಬಂದಿತು. ಇತ್ತೀಚಿನ ಜಾಹೀರಾತಿನಲ್ಲಿ ಅಕ್ಷಯ್ ಕುಮಾರ್ ಮತ್ತು ಮರಾಠರನ್ನು ಅವಮಾನಿಸಿದ್ದ ಪ್ರಕರಣದಲ್ಲಿ #BanNirma ಕೂಡ ಟ್ರೆಂಡ್ ಆಗಿತ್ತು. ನಿರ್ಮಾ ವಾಶಿಂಗ್ ಪೌಡರ್ ಬಳಸಿ ಬಟ್ಟೆ ಒಗೆಯುವುದು ಆ ಕಾಲದಲ್ಲಿ ಟ್ರೆಂಡ್ ಎಂದು ಪರಿಗಣಿಸಲಾಗುತ್ತಿತ್ತು.
ಆದರೆ ನಿರ್ಮಾ ಪ್ಯಾಕೆಟ್ ನ ಮೇಲಿರುವ ಈ ಹುಡಿಗುಯ ಕಥೆ ಹಾಗು ನಿರ್ಮಾ ಕಂಪೆನಿಯ ಸಕ್ಸೆಸ್ ಸ್ಟೋರಿಯ ಹಿಂದಿನ ರಹಸ್ಯವೇನು ಗೊತ್ತಾ?
ನಿರ್ಮಾ ಯಾರ ಹೆಸರಾಗಿತ್ತು? ಪ್ಯಾಕೆಟ್ ಮೇಲೆ ಈ ಹುಡುಗಿಯ ಚಿತ್ರವೇ ಯಾಕೆ?
ನಿರ್ಮಾ ವಾಸ್ತವವಾಗಿ ನಿರ್ಮಾ ವಾಷಿಂಗ್ ಪೌಡರ್ ಕಂಪನಿಯ ಮಾಲೀಕ ಕರ್ಸನ್ ಭಾಯ್ ಅವರ ಮಗಳು. ಆಕೆಯ ನಿಜವಾದ ಹೆಸರು ನಿರುಪಮಾ ಕರ್ಸನ್‌ಭಾಯಿ, ಆದರೆ ಕರ್ಸನ್‌ಭಾಯ್ ತಮ್ಮ ಮಗಳನ್ನು ನಿರ್ಮಾ ಎಂದು ಪ್ರೀತಿಯಿಂದ ಕರೆಯುತ್ತಿದ್ದರು. ಇವರಿಗೆ ಮಗಳೇ ಸರ್ವಸ್ವ ಆದರೆ ಮಗಳು ಚಿಕ್ಕ ವಯಸ್ಸಿನಲ್ಲೇ ಅಪಘಾತವೊಂದರಲ್ಲಿ ತೀರಿಕೊಂಡಳು. ಮಗಳ ಸಾವಿನಿಂದ ಕರ್ಸನ್ ಭಾಯಿ ಸಂಪೂರ್ಣವಾಗಿ ಕುಸಿದು ಹೋದರು ಮತ್ತು ನಂತರ ಅವರು ತಮ್ಮ ಮಗಳ ಹೆಸರನ್ನು ಅಮರಗೊಳಿಸಲು ಯೋಚಿಸಿ ನಂತರ ನಿರ್ಮಾ ವಾಷಿಂಗ್ ಪೌಡರ್ ಕಂಪೆನಿಯನ್ನೇ ಕಟ್ಟಿದರು.
ಅಸಲಿಗೆ ನಿರ್ಮಾದ ಫೇಮಸ್ ವೈಟ್ ಫ್ರಾಕ್ ಹಾಕಿ ನಿಂತಿರುವ ಚಿತ್ರ ಅದು ಕರ್ಸನ್ ಭಾಯ್ ಪಟೇಲ್ ರವರ ಮಗಳದ್ದೇ ಆಗಿದೆ.
ಕರ್ಸನ್ ಭಾಯಿ ಪಟೇಲ್ ರದ್ದೂ ರೋಚಕ ಕಥೆಯೆಂದೇ ಹೇಳಬಹುದು
ಕರ್ಸನ್ ಭಾಯ್ ಪಟೇಲ್ 1944 ರಲ್ಲಿ ಗುಜರಾತ್‌ನ ಮೆಹ್ಸಾನಾ ಜಿಲ್ಲೆಯಲ್ಲಿ ಜನಿಸಿದರು. ಕರ್ಸನ್ ಭಾಯ್ ಪಟೇಲ್ ಅತ್ಯಂತ ಸಾಮಾನ್ಯ ಕುಟುಂಬದಿಂದ ಬಂದವರು. ಕರ್ಸನ್ ಭಾಯ್ ಪಟೇಲರ ತಂದೆ ಒಬ್ಬ ರೈತ. ಕರ್ಸನ್ ಭಾಯ್ ತಮ್ಮ ಪ್ರಾಥಮಿಕ ಶಿಕ್ಷಣವನ್ನ ತಮ್ಮ ಹಳ್ಳಿಯಲ್ಲಿಯೇ ಪಡೆದರು. ಅದರ ನಂತರ ಕರ್ಸನ್ ಭಾಯಿ ಬಿ.ಎಸ್ಸಿ ಪ್ರವೇಶ ಪಡೆದು ಪದವಿ ಪಡೆದರು. ಡಿಗ್ರಿ ಸಿಕ್ಕ ಬಳಿಕ ಕರ್ಸನ್ ಭಾಯಿ ತನ್ನದೇ ಒಂದು ಉದ್ಯಮವನ್ನು ತೆರೆಯಲು ಬಯಸಿದರು ಆದರೆ ಆರ್ಥಿಕ ಸ್ಥಿತಿಯಿಂದಾಗಿ ಅವರಿವೆ ಹೂಡಿಕೆಗೆ ಹಣವಿರಲಿಲ್ಲ, ಹಾಗಾಗಿ ಅವರು ಕೆಲಸ ಮಾಡುವ ಆಯ್ಕೆಯನ್ನ ಆರಿಸಿಕೊಳ್ಳಬೇಕಾಯಿತು.
ಕರ್ಸನ್ ಭಾಯ್ ಪಟೇಲ್ ಅವರು ಲ್ಯಾಬ್‌ನಲ್ಲಿ ಲ್ಯಾಬ್ ನಲ್ಲಿ ಅಸಿಸ್ಟೆಂಟ್ ಆಗಿ ಕೆಲಸ ಮಾಡಲು ಪ್ರಾರಂಭಿಸಿದರು. ಸ್ವಲ್ಪ ಸಮಯದ ನಂತರ ಕರ್ಸನ್ ಭಾಯಿ ಗುಜರಾತಿನ ಭೂವಿಜ್ಞಾನ ಮತ್ತು ಗಣಿಗಾರಿಕೆ ಇಲಾಖೆಯಲ್ಲಿ ಸರ್ಕಾರಿ ಕೆಲಸ ಪಡೆದರು. ಅದರ ನಂತರ ಅವರ ಕುಟುಂಬದ ಆರ್ಥಿಕ ಸ್ಥಿತಿ ಸಾಮಾನ್ಯವಾಯಿತು. ಆದರೆ ಕರ್ಸನ್ ಭಾಯಿಯ ಹೃದಯ ಮತ್ತು ಮನಸ್ಸು ಯಾವಾಗಲೂ ಉದ್ಯಮದ ಕಡೆಗೇ ಇತ್ತು. ಈ ಕಾರಣದಿಂದಾಗಿ, ಅವರು ಯಾವ ಕ್ಷೇತ್ರದಲ್ಲಿ ತಮ್ಮ ಸ್ವಂತ ವ್ಯವಹಾರವನ್ನು ಪ್ರಾರಂಭಿಸಬೇಕು ಎಂಬ ವಿಷಯದ ಬಗ್ಗೆ ಯಾವಾಗಲೂ ಯೋಚಿಸುತ್ತಿದ್ದರು. ಏತನ್ಮಧ್ಯೆ, ಕರ್ಸನ್ ಭಾಯ್ ಪಟೇಲ್ ಯಾಕೆ ಒಂದು ಡಿಟರ್ಜೆಂಟ್ ಪೌಡರ್ ತಯಾರಿಸಿ ಅದನ್ನು ಸಣ್ಣ ಪ್ರಮಾಣದಲ್ಲಿ ಮಾರಾಟ ಮಾಡಬಾರದು ಎಂದು ಯೋಚಿಸಿದರು.
ಆ ಸಮಯದಲ್ಲಿ ಇತರ ಡಿಟರ್ಜೆಂಟ್ ಪೌಡರ್ ಗಳನ್ನ ಮಾರುಕಟ್ಟೆಯಲ್ಲಿ ಬಹಳ ದುಬಾರಿ ಬೆಲೆಗೆ ಮಾರಾಟ ಮಾಡಲಾಗುತ್ತಿತ್ತು. ಒಂದು ಕೆಜಿಗೆ ಸುಮಾರು 15 ರಿಂದ 30 ರೂಪಾಯಿಗೆ ಡಿಟರ್ಜೆನ್ ಪೌಡರ್ ಅನ್ನು ಮಾರಾಟ ಮಾಡಲಾಗುತ್ತಿತ್ತು ಮತ್ತು ಅದು ಮಧ್ಯಮ ವರ್ಗದ ಜನರಿಗೆ ಖರೀದಿಸುವುದು ತುಂಬಾ ಕಷ್ಟಕರವಾಗಿತ್ತು. ನಂತರ ಕರ್ಸನ್ ಭಾಯಿ ಅಗ್ಗದ ದರದಲ್ಲಿ ಕ್ಲಾಸಿ ಡಿಟರ್ಜೆಂಟ್ ಪೌಡರ್ ತಯಾರಿಸುವ ಮೂಲಕ ವ್ಯಾಪಾರ ಮಾಡಲು ನಿರ್ಧರಿಸಿದರು. ಆರಂಭಿಕ ಅವಧಿಯಲ್ಲಿ, ಕರ್ಸನ್ ಭಾಯಿ ತನ್ನ ಕೆಲಸದಿಂದ ಸ್ವಲ್ಪ ಸಮಯ ತೆಗೆದುಕೊಂಡು ತನ್ನ ಮನೆಯ ಹಿಂಭಾಗದ ಅಂಗಳದಲ್ಲಿ ಪ್ರತಿನಿತ್ಯ ಡಿಟರ್ಜೆಂಟ್ ಪೌಡರ್ ತಯಾರಿಸಲು ಮತ್ತು ತನ್ನ ನೆರೆಹೊರೆಯವರಿಗೆ ಮಾರಾಟ ಮಾಡಲು ಪ್ರಾರಂಭಿಸಿದರು. ಕ್ರಮೇಣ, ಕರ್ಸನ್ ಭಾಯಿ ತನ್ನ ಉತ್ಪನ್ನವನ್ನು ದೂರದ ಪ್ರದೇಶಗಳಿಗೂ ಸೈಕಲ್‌ಗಳಲ್ಲಿ ಮಾರಾಟ ಮಾಡಲು ಪ್ರಾರಂಭಿಸಿದರು.
ಇತರ ಕಂಪನಿಗಳ ಡಿಟರ್ಜೆಂಟ್ ಪೌಡರ್‌ಗಳು 15 ರಿಂದ 30 ರೂ. ಕೆಜಿಗೆ ಮಾರಾಟವಾಗುತ್ತಿದ್ದವು, ಕರ್ಸನ್‌ಭಾಯ್ ತನ್ನ ಉತ್ಪನ್ನವನ್ನು ಕೇವಲ ₹3 ಕೆಜಿಗೆ ಮಾತ್ರ ಮಾರಾಟ ಮಾಡುತ್ತಿದ್ದರು, ಈ ಕಾರಣದಿಂದಾಗಿ ಕರ್ಸನ್ ಭಾಯ್ ಅವರ ಡಿಟರ್ಜೆಂಟ್ ಪೌಡರ್‌ನ ಪ್ರಾಮುಖ್ಯತೆಯು ಸಾಮಾನ್ಯ ಮತ್ತು ಮಧ್ಯಮ ವರ್ಗದ ಜನರಲ್ಲಿ ಹೆಚ್ಚಾಯಿತು. ಕ್ರಮೇಣ, ಕರ್ಸನ್ ಭಾಯ್ ಅವರ ವ್ಯಾಪಾರವು ಕಾಲಾನಂತರದಲ್ಲಿ ಬೆಳೆಯಿತು, ನಂತರ ಅವರು ಸರ್ಕಾರಿ ಕೆಲಸವನ್ನು ಬಿಡಲು ನಿರ್ಧರಿಸಿದರು ಮತ್ತು ಅವರು ಸಂಪೂರ್ಣ ಸಮಯವನ್ನು ಡಿಟರ್ಜೆಂಟ್ ಪೌಡರ್ ವ್ಯವಹಾರಕ್ಕೆ ಮೀಸಲಿಟ್ಟರು.
ಕರ್ಸನ್ ಭಾಯ್ ತನ್ನ ಡಿಟರ್ಜೆಂಟ್ ಪೌಡರ್‌ಗೆ ನಿರ್ಮಾ ಎಂದು ಹೆಸರಿಟ್ಟರು, ಈ ಕಾರಣದಿಂದಾಗಿ ಅವರು ಪ್ರತಿ ಮನೆಯಲ್ಲೂ ತಮ್ಮ ಮಗಳ ಹೆಸರು ಉಳಿಯುತ್ತದೆ ಎಂದು ನಂಬಿದ್ದರು. ಕರ್ಸನ್ ಭಾಯಿ ತನ್ನ ಉತ್ಪನ್ನವನ್ನು ಗುಜರಾತಿನ ಹೊರಗೆ ಮಾರಲು ಹೊಸ ಆಲೋಚನೆಗಳೊಂದಿಗೆ ಹೋರಾಡಿದರು.
ಕರ್ಸನ್ ಭಾಯ್ ಆಕರ್ಷಕ ಜಾಹೀರಾತುಗಳ ಮೂಲಕ ತಮ್ಮ ಡಿಟರ್ಜೆಂಟ್ ಪೌಡರ್ ನಿರ್ಮಾ ಕಂಪೆನಿಯನ್ನ ಪಾಪುಲರ್ ಗೊಳಿಸಲು ಆರಂಭಿಸಿದರು. ಅದರ ನಂತರ ನಿರ್ಮಲಾ ಡಿಟರ್ಜೆಂಟ್ ಪೌಡರ್ ಆಕರ್ಷಣೆ ಜನರಲ್ಲಿ ಹೆಚ್ಚಾಯಿತು ಏಕೆಂದರೆ ಇದು ಅಗ್ಗದ ದರದಲ್ಲಿ ಒಂದು ಶ್ರೇಷ್ಠವಾದ ಡಿಟರ್ಜೆಂಟ್ ಪೌಡರ್ ಆಗಿತ್ತು. ಕ್ರಮೇಣ ಜನರಲ್ಲಿ ನಿರ್ಮಾ ವಾಷಿಂಗ್ ಪೌಡರ್ ಟ್ರೆಂಡ್ ಹೆಚ್ಚುತ್ತಾ ಹೋಯಿತು ಮತ್ತು ನಿರ್ಮಾ ವಾಷಿಂಗ್ ಪೌಡರ್ ಆ ಕಾಲದ ಅತ್ಯುತ್ತಮ ಮತ್ತು ಹೆಚ್ಚು ಬಳಸುವ ಡಿಟರ್ಜೆಂಟ್ ಪೌಡರ್ ಆಗಿ ಮಾರ್ಪಟ್ಟಿತು. ನಿರ್ಮಾ ವಾಷಿಂಗ್ ಪೌಡರ್ ಎಲ್ಲಾ ಇತರ ಬ್ರಾಂಡ್‌ಗಳನ್ನ ಹಿಂದಿಕ್ಕಿತು. ಆ ಸಮಯದಲ್ಲಿ ನಿರ್ಮಾ ಬ್ರ್ಯಾಂಡ್ ಜೊತೆ ಸ್ಪರ್ಧಿಸಲು ಮಾರುಕಟ್ಟೆಯಲ್ಲಿ ಯಾವ ಕಂಪೆನಿಗಳಿಗೂ ಸ್ಪರ್ಧಿಸಿ ನಿಲ್ಲಲು ಸಾಧ್ಯವಾಗಲಿಲ್ಲ.
1995 ರಲ್ಲಿ, ಕರ್ಸನ್ ಭಾಯ್ ಪಟೇಲ್ ಅವರು ಗುಜರಾತ್‌ನ ಅಹಮದಾಬಾದ್‌ನಲ್ಲಿ ನಿರ್ಮಾ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯನ್ನು ಸ್ಥಾಪಿಸಿದರು ಮತ್ತು 2003 ರಲ್ಲಿ ನಿರ್ಮಾ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಮತ್ತು ಸೈನ್ಸ್ ಅನ್ನು ಸ್ಥಾಪಿಸಿದರು, ನಂತರ ನಿರ್ಮಾ ವಿಭಿನ್ನ ಗುರುತನ್ನು ಪಡೆಯಿತು. ನಿರ್ಮಾ ಕಂಪನಿ ಇಂದು ದೇಶದ ಅತ್ಯಂತ ಪ್ರಸಿದ್ಧ ವಾಷಿಂಗ್ ಪೌಡರ್ ಕಂಪನಿಯಾಗಿದೆ. ಈ ಕಂಪನಿಯ ಮಾಲೀಕರಾದ ಕರ್ಸನ್ ಭಾಯ್ ಪಟೇಲ್ ಅವರ ಆಸ್ತಿ ಸುಮಾರು 1000 ಮಿಲಿಯನ್ ಡಾಲರ್ ಎಂದು ಹೇಳಲಾಗುತ್ತದೆ. ಕರ್ಸನ್ ಭಾಯ್ ಪಟೇಲ್ ಭಾರತದ ಶ್ರೀಮಂತ ಉದ್ಯಮಿಗಳ ಪಟ್ಟಿಯಲ್ಲಿ 39 ನೇ ಸ್ಥಾನದಲ್ಲಿದ್ದಾರೆ. ಸಾಮಾನ್ಯ ವೃತ್ತಿಪರ ಉದ್ಯೋಗ ಹೊಂದಿರುವ ವ್ಯಕ್ತಿಯು ಈ ಯಶಸ್ಸಿನ ಮಟ್ಟವನ್ನು ತಲುಪುವುದು ನಿಜಕ್ಕೂ ವಿಸ್ಮಯಕಾರಿಯೇ ಸರಿ.
