ಲಕ್ಷಾಂತರ ಮಂದಿ ಕೋರಿಯನ್ನರ ಪಾಲಿಗೆ ಅಯೋಧ್ಯೆಯೇ ಮಾತೃಭೂಮಿ: ದೂರದ ಕೋರಿಯಾಗೂ ರಾಮನಗರಿ ಅಯೋಧ್ಯೆಗೂ ಏನು ಸಂಬಂಧ ಗೊತ್ತಾ?

ರಾಮನಗರಿ ಅಯೋಧ್ಯೆ ಹಾಗೂ ವಿದೇಶದ ನಡುವಿನ ನಂಟಿನ ಬಗ್ಗೆ ಅನೇಕ ಆಸಕ್ತಿದಾಯಕ ಕಥೆಗಳಿವೆ. ದಕ್ಷಿಣ ಕೊರಿಯಾದ ಜನರು ಇಂದಿಗೂ ಅಯೋಧ್ಯೆಯನ್ನು ತಮ್ಮ ಮಾತೃಭೂಮಿ ಎಂದು ಪರಿಗಣಿಸುತ್ತಾರೆ.

ಅಯೋಧ್ಯೆಯಲ್ಲಿ ಶ್ರೀರಾಮ ಮಂದಿರದ ಪ್ರಾಣ ಪ್ರತಿಷ್ಠೆ ಕಾರ್ಯಕ್ರಮಕ್ಕೆ ಭರದ ಸಿದ್ಧತೆ ನಡೆಯುತ್ತಿದೆ. ಜನವರಿ 22ರಂದು ರಾಮ ಮಂದಿರ ಉದ್ಘಾಟನೆ ನಡೆಯಲಿದ್ದು, ತದ ನಂತರ ಭಕ್ತರಿಗೆ ಶ್ರೀರಾಮ ದರ್ಶನ ಸಿಗಲಿದೆ. ಭಗವಾನ್ ಶ್ರೀರಾಮನ ನಗರವಾದ ಅಯೋಧ್ಯೆಗೆ ಸಂಬಂಧಿಸಿದ ಅನೇಕ ಕಥೆಗಳನ್ನು ನೀವು ಕೇಳಿರಬಹುದು. ರಾಮನಗರಿ ಅಯೋಧ್ಯೆ ಹಾಗೂ ವಿದೇಶದ ನಡುವಿನ ನಂಟಿನ ಬಗ್ಗೆ ಅನೇಕ ಆಸಕ್ತಿದಾಯಕ ಕಥೆಗಳಿವೆ.

ದಕ್ಷಿಣ ಕೊರಿಯಾದ ಜನರು ಇಂದಿಗೂ ಅಯೋಧ್ಯೆಯನ್ನು ತಮ್ಮ ಮಾತೃಭೂಮಿ ಎಂದು ಪರಿಗಣಿಸುತ್ತಾರೆ ಮತ್ತು ಈ ನಂಬಿಕೆಯು ಅಲ್ಲಿದೆ. 2 ಸಾವಿರ ವರ್ಷಗಳಿಂದ ಇದು ನಡೆದುಕೊಂಡು ಬಂದಿದೆ. ಈ ನಂಬಿಕೆಯೊಂದಿಗೆ ದಕ್ಷಿಣ ಕೊರಿಯಾದ ಜನರು ತಮ್ಮ ಸಂಪ್ರದಾಯವನ್ನು ಅನುಸರಿಸಲು ಅಯೋಧ್ಯೆಗೆ ಬರುತ್ತಿರುತ್ತಾರೆ. ಹಾಗಾದ್ರೆ ಇಲ್ಲಿನ ಜನರು ಇಂತಹ ನಂಬಿಕೆ ಬೆಳೆಸಿಕೊಂಡಿದ್ದು ಹೇಗೆ? ಇದರ ಹಿಂದಿನ ಗುಟ್ಟೇನು? ಇಲ್ಲಿದೆ ಇಂಟ್ರೆಸ್ಟಿಂಗ್ ಮಾಹಿತಿ.

ಪ್ರತಿವರ್ಷ ಅಯೋಧ್ಯೆಗೆ ಆಗಮಿಸುವ ದಕ್ಷಿಣ ಕೊರಿಯಾದ ಜನರು ಅಲ್ಲಿನ ಕಿಮ್ ರಾಜವಂಶಕ್ಕೆ ಸೇರಿದವರು. ಈ ಜನರು ಅಯೋಧ್ಯೆಯನ್ನು ತಮ್ಮ ರಾಣಿಯ ತವರು ಮನೆ ಎಂದು ಪರಿಗಣಿಸುತ್ತಾರೆ. ಈ ರಾಣಿಯ ಹೆಸರು ‘ರಾಣಿ ಹೋ’ ಮತ್ತು ಆಕೆ 2 ಸಾವಿರ ವರ್ಷಗಳ ಹಿಂದೆ ಕೊರಿಯಾದ ರಾಣಿಯಾಗಿದ್ದಳು. ಇದರಿಂದಾಗಿ ದಕ್ಷಿಣ ಕೊರಿಯಾದ ಜನರು ಅಯೋಧ್ಯೆಯನ್ನು ತಮ್ಮ ಮಾತೃಭೂಮಿ ಎಂದು ಪರಿಗಣಿಸುತ್ತಾರೆ. ಕೊರಿಯಾದ ನಂಬಿಕೆಯ ಪ್ರಕಾರ, ಅಯೋಧ್ಯೆಯ ರಾಜಕುಮಾರಿಯು ದಕ್ಷಿಣ ಕೊರಿಯಾದ ರಾಜಕುಮಾರನನ್ನು ವಿವಾಹವಾಗಿದ್ದರು.

ಅಯೋಧ್ಯೆಗೂ ದಕ್ಷಿಣ ಕೊರಿಯಾಗೂ ನಂಟು

ನಮ್ಮ ಇತಿಹಾಸದ ಪುಸ್ತಕಗಳಲ್ಲಿ ಹೇಳಿರುವಂತೆ, 2000 ವರ್ಷಗಳ ಹಿಂದೆ ಭಾರತೀಯ ರಾಜಕುಮಾರಿಯು ಕೊರಿಯಾದ ರಾಜನನ್ನು ಮದುವೆಯಾಗಿದ್ದರು. ರಾಜಕುಮಾರಿಯು ‘ಆಯುತ’ಕ್ಕೆ ಸೇರಿದವಳು. ಅಯುತ ಎಂದರೆ ಕೊರಿಯನ್ ಭಾಷೆಯಲ್ಲಿ ಅಯೋಧ್ಯೆ.

‘ರಾಣಿ ಹೋ’ ಆದ ಸುರೀರತ್ನ

ಒಂದಾನೊಂದು ಕಾಲದಲ್ಲಿ ಭಾರತದ ಪುರಾತನ ನಗರವಾದ ಅಯೋಧ್ಯೆಯಲ್ಲಿ ಅಯುತಾಯನ ರಾಜಕುಮಾರಿ ಸೂರಿರತ್ನ ಎಂಬ ಸುಂದರ ರಾಜಕುಮಾರಿ ವಾಸಿಸುತ್ತಿದ್ದಳು. ಅವಳು ರಾಜ ಸೂರ್ಯವರ್ಮನ್ ಮತ್ತು ರಾಣಿ ಮಯೂರ್ಚತನ ಮಗಳು. ಒಂದು ದಿನ, ರಾಜಕುಮಾರಿ ಸೂರಿರತ್ನಗೆ ಕನಸು ಬಿದ್ದು, ಅದರಲ್ಲಿ ಆಕೆ ದೂರದ ದೇಶದಿಂದ ಬೆಳಕು ಬರುತ್ತಿರುವುದನ್ನು ನೋಡಿದಳು.

ಈ ಕನಸನ್ನು ಸಂಕೇತವಾಗಿ ತೆಗೆದುಕೊಂಡು, ರಾಜಕುಮಾರಿಯು ಈ ಬೆಳಕಿನ ಮೂಲವನ್ನು ಹುಡುಕಲು ಯೋಚಿಸಿದಳು. ಇದಕ್ಕಾಗಿ ಸಮುದ್ರಯಾನ ಹೋಗಲು ನಿರ್ಧರಿಸಿದರು. ಅವಳು ತನ್ನ ಸಹಚರರೊಂದಿಗೆ ಹೊರಟು ಸಾಗರದಾದ್ಯಂತ ಪ್ರಯಾಣಿಸಿದಳು. ಸುದೀರ್ಘ ಮತ್ತು ಅಪಾಯಕಾರಿ ಪ್ರಯಾಣದ ನಂತರ, ಆಕೆ ದಕ್ಷಿಣ ಕೊರಿಯಾದಲ್ಲಿರುವ ಗಿಮ್ಹೇ ಕರಾವಳಿಯನ್ನು ತಲುಪಿದರು.

ಸ್ಥಳೀಯ ರಾಜ, ಕರಕ್ ಕುಲದ ರಾಜ ಕಿಮ್ ಸುರೋ, ರಾಜಕುಮಾರಿ ಸುರೀರತ್ನಳ ಸೌಂದರ್ಯಕ್ಕೆ ಮಾರುಹೋದ. ಅವನು ಅವಳನ್ನು ತುಂಬಾ ಇಷ್ಟಪಟ್ಟ, ಅವನು ಅವಳೆದುರು ಮದುವೆಯ ಪ್ರಸ್ತಾಪವನ್ನು ಮಾಡಿದ ಮತ್ತು ಅವಳು ಇದಕ್ಕೆ ಒಪ್ಪಿದಳು. ರಾಜಕುಮಾರಿ ಸುರೀರತ್ನ ತನ್ನ ಮದುವೆಯ ನಂತರ ರಾಣಿ ಹಿಯೋ ಹ್ವಾಂಗ್-ಓಕ್ ಆದಳು.

ಕರಕ್ ಸಾಮ್ರಾಜ್ಯದ ಮೊದಲ ರಾಣಿ

ಇಷ್ಟೇ ಅಲ್ಲದೇ ಆಕೆ ಕರಕ್ ಸಾಮ್ರಾಜ್ಯದ ಮೊದಲ ರಾಣಿಯಾದಳು ಎಂದು ಹೇಳಲಾಗುತ್ತದೆ. ರಾಣಿ ಹಿಯೋ ಹ್ವಾಂಗ್-ಓಕ್ ಮತ್ತು ರಾಜ ಕಿಮ್ ಸುರೋ ಒಟ್ಟಿಗೆ ರಾಜ್ಯವನ್ನು ಆಳಿದರು ಮತ್ತು ರಾಜವಂಶವನ್ನು ಸ್ಥಾಪಿಸಿದರು. ಅನೇಕ ವರದಿಗಳ ಪ್ರಕಾರ, ಅವರು ಹತ್ತು ಮಕ್ಕಳನ್ನು ಹೊಂದಿದ್ದರು ಮತ್ತು ಅವರ ವಂಶಸ್ಥರು ಕೊರಿಯಾದ ಇತಿಹಾಸದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ರಾಣಿ ಹಿಯೋ ಹ್ವಾಂಗ್-ಓಕ್ ಅವರ ದಂತಕಥೆಯನ್ನು ಭಾರತ ಮತ್ತು ಕೊರಿಯಾ ನಡುವಿನ ಆಳವಾದ ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಸಂಬಂಧಗಳ ಸಂಕೇತವಾಗಿ ನೋಡಲಾಗುತ್ತದೆ.

ರಾಣಿಯ ನೆನಪಿಗೆ ಅಯೋಧ್ಯೆಯಲ್ಲಿ ಪಾರ್ಕ್

ಈ ಮನ್ನಣೆಯನ್ನು ಗಮನದಲ್ಲಿಟ್ಟುಕೊಂಡು ಆಡಳಿತಾತ್ಮಕ ಮಟ್ಟದಲ್ಲಿಯೂ ಉಭಯ ದೇಶಗಳ ನಡುವಿನ ಸಂಬಂಧವನ್ನು ಬಲಪಡಿಸಲು ಪ್ರಯತ್ನಿಸಲಾಗುತ್ತಿದೆ. ಅಯೋಧ್ಯೆಯಲ್ಲಿ ದಕ್ಷಿಣ ಕೊರಿಯಾದ ರಾಜಕುಮಾರಿಯ ಹೆಸರಿನಲ್ಲಿ ಸ್ಮಾರಕ ಉದ್ಯಾನವನವನ್ನು ಸಹ ನಿರ್ಮಿಸಲಾಗಿದೆ. ಸರಯೂ ನದಿಯ ದಡದಲ್ಲಿ ನಿರ್ಮಿಸಲಾದ ಈ ಉದ್ಯಾನವನವು ಪ್ರವಾಸೋದ್ಯಮದ ದೃಷ್ಟಿಯಿಂದಲೂ ವಿಶೇಷವಾಗಿದೆ.

ಅಯೋಧ್ಯೆ ಮತ್ತು ದಕ್ಷಿಣ ಕೊರಿಯಾದ ಸಂಸ್ಕೃತಿಯನ್ನು ಪಾಲಿಸುವ ಈ ಉದ್ಯಾನವನದ ಅತ್ಯಂತ ವಿಶೇಷವಾದ ಸಂಗತಿಯೆಂದರೆ, ಭಾರತದಿಂದ ಕೊರಿಯಾಕ್ಕೆ ರಾಣಿ ಹೋ ಅವರ ಜೀವನ ಪಯಣವನ್ನು ಆಧರಿಸಿ ಹಲವಾರು ನೆನಪುಗಳನ್ನು ಬಿಚ್ಚಿಡಲಾಗಿದೆ. ಉದ್ಯಾನದಲ್ಲಿ ಎರಡು ಮಂಟಪಗಳಿವೆ. ಎರಡೂ ರಾಜಮನೆತನಗಳಿಗೆ ಸಂಬಂಧಿಸಿವೆ. ಒಂದು ದಕ್ಷಿಣ ಕೊರಿಯಾದ ರಾಜಕುಮಾರನ ಕುಟುಂಬಕ್ಕೆ ಮತ್ತು ಇನ್ನೊಂದು ಅಯೋಧ್ಯೆಯ ರಾಣಿ ಮತ್ತು ರಾಜಕುಮಾರಿಯ ಕುಟುಂಬಕ್ಕೆ ಸೇರಿದೆ.